Notisia

Autoridade RAEOA-ZEESM-TL Asina Nota Entedimentu ho Fundasaun MAEKOM

RAEOA; Sesta-feira, 11 Fevereiru 2022, Presidente Autoridade Rejiaun Administrativa Espesial Oe-cusse Ambeno (RAEOA) Arsénio Paixao Bano, akompana husi sekretáriu Rejionál Agrikultura José Eta, Sekretáriu Rejionál Komérsiu no Industria Pedro da C. B. da Silva, partisipa mós diretor Agrikultura Cerilo Remendios Baba, Diretora Komérsiu no Industria Domingas Sufa, Ohin iha realiza serimónia asina Nota Entendimentu entre Região Administrativa Especial Oé-Cusse Ambeno, Zona Especial Economia Sosiál Mercado Timor-Leste – RAEOA-ZEESM TL, no Fundasaun Movimentu Asaun Ekonomia Komunitária – MAEKOM iha salaun Gabineti Presidente Autoridade Oe-bau.  
 
Objetivu husi nota entendimentu refere sai hanesan baze ba konkordánsia hotu ne'ebé mak Fundasaun MAEKOM-nia entidade sira sei formaliza iha tempu oin mai atu hamutuk dezenvolve setór produtivu, inklui promove programa agro-indústria ne'ebé iha kbiit negósiu, independente, no sustentavel iha tempu naruk iha RAEOA-ZEESM-TL.
 
Liu husi nota entendimentu ne’e, parte-rua sei dezenvolve enkuadramentu serbisu komún ba kooperasaun iha setór agrikultura integradu, espansaun produtu agríkola, prosesamentu ka diversifikasaun, manufatura, no merkadoria.
 
Presidente Fundação MAEKOM, Eng. Rui Manuel de Castro Pereira, iha nia intervensaun hato’o katak MAEKOM agradese RAEOA tanba bele fó konfiansa ba MAEKOM hanesan parseiru atu bele hola parte iha dezenvolvimentu ekonomia iha RAEOA-ZEESM-TL liu-liu iha setór Agríkola no agro-indústria ne'ebé la'ós de’it atu implementa program governu lokál nian, maibé foku ba atu habiit agrikultór sira no akompaña sira hodi hetan benefísiu másimu iha kelu fornesimentu tomak iha indústria refere.
 
"Semana oin Fundação MAEKOM sei aprezenta ba Autoridade RAEOA-ZEESM-TL planu investimentu lima (5), inklui loja agrikultura, investimentu manu-broiler no manu-tolun, habokur karau, eskema garante kréditu ba agrikultór, sentru kulinária, no peskiza ba asuntu negósiu", Prezidente Fundasaun MAEKOM, ne'e hatutan katak planu investimentu ne'e bainhira asina nota entendimentu entre RAEOA-ZEESM-TL.
 
Prezidente Autoridade RAEAO-ZEESM TL, iha nia intervensaun hato’o asina nota entendimentu ida ne'e tuir loloos realiza ona iha tinan 2021 maibé tanba situasaun covid -19 maka impede akordu ida ne'e.
 
Dirijente ne'e mós informa kona-ba sistema funsaun (Free Balance) ne'ebé diferente ho tinan hirak liu ba, tanba MAECOM atu kopera ho di'ak hodi funsiona servisu ho di'ak.