Notisia

Deklarasaun MAEKOM ba Diâlogu ba Simeira Sistema AI-Han iha Timor-Leste

Deklarasaun MAEKOM ba Diâlogu ba Simeira Sistema AI-Han iha Timor-Leste

Antesedente
Movimentu Asaun Ekonomia Komunitária [MAEKOM] nu’udar grupu ida ne’ebé kompostu husi Timor-oan sira ho profisaun no esperiénsia oin-oin ne’ebé kompromisu atu garante dezenvolvimentu ekonomia iha Timor-Leste, liu-liu iha setór produtivu agríkola nian, nune’e bele hakabit ekonomia família no kresimentu ekonomia nasaun nian.

MAEKOM hala’o ona investimentu dahuluk iha Timor-Leste iha setór pekuária hanesan hakiak manu-frangu (broiler), tuirmai hahú investe iha indústria matadouru, indústria diversifikasaun produtu na'an, prosesamentu batar no hare hodi sai foos bolu "Foos Maubere" ne'ebé sei fó kontribuisaun signifikante atu hadi’ak nutrisaun Timor-oan no hasa’e númeru asesu ba na’an fresku, nomós hahán lokál, kria kampu servisu iha territóriu tomak hodi diversifika ita-nia ekonomia tuir Planu Estratéjiku Dezenvolvimentu Nasionál (PEDN, 2011).

Maski iha situasaun COVID-19, MAEKOM nafatin hasa’e númeru hakiak hodi bele responde ba nesesidade merkadu nasionál, nomós povu bele asesu ba na’an kualidade ho folin ne'ebé baratu, ho nune’e ema hotu bele asesu, no ajuda hadi’ak ekonomia uma-kain, hasa’e kresimentu ekonomia nasaun, kore-aan husi dependénsia rekursu naturais no asesu na’an folin baratu hodi hamenus deznutrisaun, liu-liu ba labarik iha futuru.

Kontribuisaun Setór Privadu iha SSA

Diálogu Nasionál dahuluk ba Simeira Sistema Ai-han (SSA) iha Timor-Leste furak atu rekolla informasaun husi parte interesada sira hodi haree, analiza no kontribui ideia konstrutivu ba ita-nia sistema ai-han (produsaun, prosesamentu, merkadoria to'o konsumidór) ne'ebé atu envolve ema hotu kona-ba sistema ai-han ida sustentavel iha futuru ho nia asaun sira ne'ebé asegura katak ai-han seguru no nutritivu ba ema hotu no presu Kompetitivu atu ema hotu bele asesu.

Envolvimentu ami (setór privadu) iha SSA importante tebes atu garante agro-indústria ba valór kadeia produsaun ai-han ida kualidade no sustentavel iha Timor-Leste.

Ami nota katak Timor-oan nia esperiénsia iha pasadu, parseiru dezenvolvimentu apoiu ona Timor-oan iha area agrikultura hodi hasa'e produsaun agríkola liuhusi projetu sira, maibé to'o ohin loron ita nafatin dependénsia ba ai-han sira importa hodi responde ba ita-nia konsume nasionál. Sé mak responsabilidade ba osan biliaun sira nebe doadór sira gasta ona iha Timor ho rezultadu sira bele dehan "mukit tebes", no agora ita nafatin liuhusi dalan ne'e, ne'ebé atu hasa'e produtu agríkola no garante nia sustentavel nafatin liuhusi projetu sira ne'ebé barak failla iha tempu pasadu? Tanba ne'e, tuir ami-nia hanoin katak atu asegura ai-han ida seguru, nutritivu, sustentavel no transforma agríkola sai oportunidade negósiu ba Timor-oan:

1. Governu tenke harii infraestrutura iha setór agrikultura hodi apoiu toos-na'in no emprezáriu sira nebe interese investe;

2. Doadór sira apoiu governu ba investimentu infraestrutura agríkola nian;

3. Governu sira iha obrigasaun fahe rezultadu peskiza agríkola nian ba emprezáriu atu investe;

4. Apoiu formasaun ida di'ak ba komunidade no emprezáriu setór agríkola;

5. Hapara kualkér projetu sira ne'ebé liga ba agrikultura no transforma fali ba servisu kooperasaun sira ba komunidade ka emprezáriu;

6. Apoiu finanseiru sira tantu husi governu no doadór sira tenke transforma fali ba forma sira empréstimu hodi komunidade no emprezáriu bele asesu hodi haboot investimentu iha setór agrikultura;

7. Mekanizmu empréstimu bele diskute entre governu no doadór sira;

8. Hadi'ak lejizlasaun sira ne'ebé impede investimentu Timor-oan iha setór agríkola;

9. Kria lejizlasaun sira hodi proteje investimentu iha setór agríkola;

10. Aprovasaun orsamentu foun ba kompañia ka organizasaun bazeia ba rezultadu;

11. Kriminaliza kompañia ka organizasaun sira ne’ebé gasta osan governu laho rezultadu no sustentabilidade ba atividade.

Bazeia ba pontu sira iha leten, MAEKOM hakarak kontribui ba susesu diálogu nasionál liuhusi SSA ne'e, no ami prontu atu akompaña família-ida ne'ebé kbiit laek hodi kumpre ami-nia deklarasaun iha pontu 4 no 5, no hatudu evidénsia katak pontu sira iha leten bele garante ai-han seguru no sustentavel iha futuru.

Dili, 13 Jullu 2021
Sinseridade,

Rui Manuel de Castro Pereira
Fundadór no Prezidente MAEKOM