Notisia

MAEKOM rejistu ona nu'udar Fundasaun ida iha Notariadu

MAEKOM rejistu ona nu'udar Fundasaun ida iha Notariadu

Iha loron Sesta-feira, 3 Dezembru 2021, Fundasaun Movimentu Asaun Ekonomia Komunitária (Fundasaun MAEKOM) rejistu iha Notariadu atu sai fundasaun ida hodi hala'o nia knar iha setór edukasaun no formasaun, peskiza no dezenvolvimentu, no advokasia ho nia membru hamutuk ema 19. 

Prezidente Fundasaun MAEKOM, Rui Manuel de Castro Pereira hateten vizaun ba fundasaun ne'e mak atu asegura soberania ekonomia komunitária ba povu Timor-Leste ne'ebé forte, justu no sustentavel.

"Molok sai fundasaun, movimentu ne'e hala'o ona nia serbisu iha setór produtivu dezde Outubru tinan 2018, ne'ebé funda husi Timor-oan ho sira-nia estudu no esperiénsia oioin iha área agrikultura, defeza, komunikasaun, petróleu, negósiu, saúde, informasaun teknolojia, legál, no enjeñaria ho objetivu prinsipál mak atu organiza ekonomia Timor-Leste hahú husi baze", dehan Prezidente Fundasaun MAEKOM, Rui Castro iha Salaun Notariadu, Ministériu Justisa, Sesta-feira, 3 Dezembru.

Prezidente Fundasaun MAEKOM, Rui Castro dehan misaun loloos husi fundasaun ne'e mak haberan família hodi sira iha koñesimentu ba negósiu, nomós sai nain ba negósiu ne'e rasik, no Fundasaun MAEKOM sei iha peritu sira hodi halo advokasia, edukasaun, peskiza no dezenvolvimentu, formasaun no jestaun negósiu hodi transforma mentalidade komunidade hodi asegura família ida, negósiu-ida.

"Fundasaun MAEKOM-nia investimentu iha setór produtivu iha tinan-tolu nia laran, ami konsege habelar ona ami-nia rede negósiu iha munisípiu sanulu-resin-rua, inklui Rejiaun Administrativu Espesiál Oé-Cusse Ambeno (RAEOA)", Prezidente Fundasaun Subliña.

Nia rekoñese katak molok Timor-Leste enfrenta pandemia COVID-19, Fundasaun MAEKOM-nia kapitál investimentu hodi hakiak manu-frangu/broiler iha Timor-Leste hahú husi Outubru 2018 to’o iha fulan Abríl 2020 kontribui ona maizumenus porsentu 30 husi nesesidade merkadu nasionál kada fulan, maibé númeru ne'e tuun tebes bainhira ita enfrenta pandemia ne'e.

Prezidente Fundasaun MAEKOM, Rui Castro dehan MAEKOM legalmente eziste ona iha Timor-Leste nu'udar fundasaun ida, sei serbisu área advokasia, edukasaun, peskiza no dezenvolvimentu, formasaun no jestaun negósiu ho Governu, parseiru dezenvolvimentu, ajénsia Nasoins Unidas, sosiedade sivíl, no setór privadu sira.

"Parseria ne'e sei foku ba área lima hodi kontribui ba dezenvolvimentu nasionál liu-liu setór produtivu sira. Fundasaun MAEKOM sei iha Nota Entendimentu ho parseiru dezenvolvimentu balun hodi fó formasaun no kria tan empreendedorizmu foun iha tempu badak", dehan Prezidente Fundasaun MAEKOM, Rui Castro, Sesta-feira ne'e iha Salaun Notariadu, Mandarin, Dili.

Prezidente Fundasaun MAEKOM, Rui Castro ho ekipa agradese ba Da Silva Teixeira & Associados ne'ebé lidera husi José Texeira liuhusi apoiu konsultór jurídiku hodi dezenvolve estatutu Fundasaun MAEKOM ne'e.