Previous Next

Cladotia FU/MAEKOM asina Nota Entendimentu ho PT. Kalbe Farma, Tbk atu sai Ajénsia Distribuisaun Aimoruk Balada iha Timor-Leste

Dili, 19 Dezembru 2019 — Cladotia FU no MAEKOM asina tan Nota Entedimentu (NE) ho PT Kalbe Farma-Animal Health Division iha Timor-Leste. NE ne’e ho objetivu Cladotia FU no MAEKOM atu sai Ajénsia Distribuisaun Autorizadu ba Ai-moruk Veterináriu nian iha Timor-Leste.

Prezidente MAEKOM nomós Diretór ba Kompania Cladotia FU, Rui Castro dehan NE ne’e pasu ida importante atu parte-rua servisu hamutuk hodi haree ba kualidade ai-moruk sira tantu antibiótika ka vitamina sira hodi halo preventiva ba saúde animál nomós hala’o kurativu sé balada sira moras iha futuru.

“Cladotia FU no MAEKOM sai ona ajénsia ofisiál ida iha Timor-Leste hodi hola no fa’an ai-moruk balada nian. Ai-moruk sira ne’e (antibiótika ka vitamina) sei supervizaun direta husi PT. Kalbe Farma, Tbk, Indonesia. NE ne’e importante tebes atu ita servisu hamutuk kontrola sirkulasaun ai-moruk veterináiru nian,” Rui dehan.

Cladotia FU/MAEKOM, Rui Castro (daruak – liman-loos), no Reprezentante PT. Kalbe Farma, Tbk, Suryadi (daruak – liman-karuk) asina nota entendimentu ne’ebé sasin husi Diretór Jerál Pekuária e Vetenária, Domingos Gusmão (dahuluk – liman-karuk) no Diretóra Pekuária no Saúde Animál Indonesia, Ni Made Ria Isriyanthi (dahuluk – liman-loos). Photo: MAEKOM.
Cladotia FU/MAEKOM, Rui Castro (daruak – liman-loos), no Reprezentante PT. Kalbe Farma, Tbk, Suryadi (daruak – liman-karuk) asina nota entendimentu ne’ebé sasin husi Diretór Jerál Pekuária e Vetenária, Domingos Gusmão (dahuluk – liman-karuk) no Diretóra Pekuária no Saúde Animál Indonesia, Ni Made Ria Isriyanthi (dahuluk – liman-loos). Photo: MAEKOM.

Prezidente MAEKOM dehan efeitu ba NE sei hahú iha fulan Janeiru 2020 no PT. Kalbe Farma sei hatama totál produtu ai-moruk 20, inklui antibiótika, vitamina no dezinfesaun ba luhan sira.

“Molok asina NE, PT Kalbe Farma haruka sira-nia reprezentante hodi vizita manu-luhan sira MAEKOM nian no sira kontente tebes haree progresu hakiak manu-frangu no akonsellamentu kona-ba maneira uza ai-moruk sira iha futuru. Tanba ne’e, sira fó konfiansa ba Cladotia FU no MAEKOM atu sai Ajeénsia Distribuisaun Autorizadu ida iha Timor-Leste”, Rui dehan.

Reprezentante PT. KALBE Farma, Tbk, Suryadi dehan sira kontente tebes koopera ho Kompañia Cladotia FU no MAEKOM hodi fornese ai-moruk balada nian ba povu Timor-Leste, liu-liu hakiak nain manu-frangu husi MAEKOM.

Asina ona Nota Entendimentu, entre Cladotia FU/MAEKOM no PT. Kalbe Farma, Tbk, nune’e Cladotia FU/MAEKOM sai Ajénsia Distribuisaun Autorizada ida ba Ai-moruk balada iha Timor-Leste. Photo: MAEKOM.
Asina ona Nota Entendimentu, entre Cladotia FU/MAEKOM no PT. Kalbe Farma, Tbk, nune’e Cladotia FU/MAEKOM sai Ajénsia Distribuisaun Autorizada ida ba Ai-moruk balada iha Timor-Leste. Photo: MAEKOM.

“Asina NE sei hasa’e level kooperasaun entre parte-rua hodi fornese ai-moruk ne’ebé kualidade aas nomós fó asisténsia téknika kona-ba uza ai-moruk balada tuir regra, loloos no meta/tarjetu sira,” Suryadi dehan.

Suryadi mós halo prátika liuhusi diagnostika ba manu-frangu hodi hatudu ba membru MAEKOM sira kona-ba tipu moras iha manu-frangu no hatene nia sintoma no sira-nia prevensaun sedu.

Asina NE observa direta husi Ministériu Agrikultura no Peskas (MAP), liuhusi Diretór Jerál Pekuária e Vetenária Domingos Gusmão no Ni Made Ria Isriyanthi husi Direktorat Jenderal Peternakan dan Kesehatan Hewan, Kementerian Pertanian, Indonesia. NE ne’e asina iha Salaun Reuniaun Kamara Komérsiu Indústria Timor-Leste (CCI-TL).

Diresaun Jerál Pekuária no Saúde Animál husi Indonesia vizita luhan membru MAEKOM

Diretóra Ni Made Ria Isriyanthi ho nia membru sira husi Direktorat Jenderal Peternakan dan Kesehatan Hewan, Kementerian Pertanian, Indonesia no reprezentante PT. Kalbe Farma, Tbk bá vizita luhan sira MAEKOM nian iha Metinaro.

Objetivu vizita ne’e atu haree direta progresu hakiak manu-frangu iha Timor-Leste no oinsá kooperasaun hamutuk entre governu-rua hodi fó apoiu masimu ba setór privadu sira atu investe maka’as iha setór pekuária.

Diretóra Ni Made Ria Isriyanthi dehan sira kontente tebes atu vizita luhan sira atu observa diretamente hodi haree faze sira nebe esensiál kona-ba hakiak manu-frangu.

Ekipa Diresaun Pekuária no Saúde Animál Indonesia ba vizita luhan manu-frangu membru MAEKOM iha Metinaro. Photo: MAEKOM
Ekipa Diresaun Pekuária no Saúde Animál Indonesia ba vizita luhan manu-frangu membru MAEKOM iha Metinaro. Photo: MAEKOM

“Ha’u haree diretamente kona-ba sanitasaun luhan no ambiente, tau hare kulit, instalasaun hamanas luhan, oksijéniu, kolokasaun ekipamentu ba hahán no bee nian. Konsidera importante mak jestaun saneamentu ba susesu hakiak manu-frangu”, Diretóra dehan.

Diretóra Ni Made Ria Isriyanthi mós dehan sira kontente servisu hamutuk ho MAP kona-ba fornesimentu ai-moruk animál husi kompañia Indonesia PT. Kalbe Farma, Tbk. Diskusaun ne’e kleur ona maibé foin mak realiza. Nia fiar iha futuru PT Kalbe Farma, Tbk sei oferese kualidade aimoruk liuhusi Ajénsia Distribuisaun Autorizadu, Cladotia FU no MAEKOM iha futuru.

Kooperasan entre MAP, Timor-Leste no Kementerian Pertanian, Indonesia

Diretór Jerál Pekuária e Vetenária, Domingos Gusmão dehan polítika Governu Daualuk enkoraja tebes setór privadu atu investe maka’as iha setór produtivu hanesan pekuária, peskas no plantasaun sira seluk.

“Diresaun Pekuária Timor-Leste halo ona kooperasaun oioin ho Diresaun Pekuária no Saúde Animál Indonesia nian. Kooperasaun entre governu-rua ne’e atu apoiu ba setór privadu sira hodi investe, tanba Governu Timor-Leste loke ona espasu tantu importa ka esporta entre nasaun-rua ba produtu agrikultura sira”, Diretór Domingos dehan.

Diretór dehan sira mós bá vizita PT Kalbe Farma, Tbk atu fornese ai-moruk ba ita-nia hakiak nain ba balada sira iha Timor-Leste.

“Ha’u-nia vizita ba PT. Kalbe Farma, ohin ita realiza duni kooperasaun entre Cladotia FU/MAEKOM no PT. Kalbe Farma, Tbk. Cladotia FU/MAEKOM mak sei sai Ajénsia Distribuisaun Autroizadu iha Timor-Leste hodi simu sira-nia produtu ai-moruk sira”, Diretór Domingos dehan.

Nia agradese ba PT. Kalbe Farma, Tbk no Cladotia FU/MAEKOM nebe ohin asina ona NE no kontratu fa’an nain iha Timor-Leste. Nia fi’ar parte-rua sei servisu hamutuk hodi hadi’ak kualidade ai-moruk nebe distribui iha Timor-Leste.


Imprimi