Previous Next

Grupu Santo Antonio hahú investe iha setór produtivu

Grupu Santo Antonio husi Ainaro konvida MAEKOM hodi introdús investimentu integradu iha setór produtivu ba membru sira tanba sira kuriozu atu hatene kona-ba investimentu ne'ebé MAEKOM hala'o ona iha territóriu tomak.

MAEKOM fó oportunidade ba membru St Antonio hodi aprezenta produtu potensiál sira iha sira-nia suku idak-idak, liutiha oinsá sira bele foku ba produtu ne'e sai produtu família no negósiu família nian.

Grupu ne'e deside atu investimentu dahuluk iha hakiak manu broiler hodi fornese ba merkadu lokál, nomós produtu pilotu ida ba grupu ne'e hodi espada ba produtu sira seluk iha futuru. Liutiha reuniaun, membru grupu ida oferese rai ektare baluk hodi harii manu-luhan no fatin ne'e sai sentru treinamentu ba grupu St Antonio iha Munisípiu Ainaro.

Prezidente MAEKOM, Rui Castro hateten MAEKOM foin dahuluk hasoru grupu boot hodi diskute kona-ba investimentu iha setór produtivu.

"MAEKOM lahó retórika maibé asaun. Ohin, ita hasoru malu hodi aprezenta kona-ba modelu investimentu ne'ebé nain mak povu. Ohin enkontru no halo kedas, ne'e mak filozofia MAEKOM nian," Rui Castro hato'o lia hirak ne'e iha sorumutu ho grupu St Antonio, iha Ainaro.

Prezidente MAEKOM agradese ba koordenadór sira St Antonio nian ne'ebé konvida atu aprezenta konseitu MAEKOM nian ba membru sira. Ita hein investimentu ne'e la'o ho ki'ik maibé ambisaun ba boot.

"MAEKOM espera katak grupu sira hahú konstrusaun no tarde liu fulan Setembru sei kolleita manu broiler dahuluk iha Sub Administrativu Ainaro", dehan Prezidente MAEKOM.

Liutiha reuniaun, grupu ne'e konvida atu ba vizita rai ektare baluk hodi hahú konstrusaun manu-luhan, no tuir estimasaun manu-luhan sei remata iha semana ikus fulan ne'e.

Investimentu setór produtivu mak dalan hodi hadi'ak rendimentu família nian no redús dezempregu, kiak no malnutrisaun iha futuru.


Imprimi